„To pull a Jacqueline“ = öppis mache, wo Lüüt wo mich guet känned sich nur chönd an Chopf lange und sich dänke: „typisch Jacqueline“

Vor de Abreis hani au „a Jacqueline pulled“ 😅 Aber nur e Mini-Version. Mitem viele schaffe vorde Flitterwuche und ehm Hochziitsfäscht hani de Chopf ned so bide Sach gha und bin ohni Uswiis und ohni Versicherigscharte vorem Corona-Tescht-Center in Züri am Bahnhof gstande. De Adrian hett ned chönne verstah wie mer ohni die einzige zwei Dokument wo‘s bruucht für en Tescht chan vo diheime losgah und hett eus scho gseh nomal heizfahre. Wel ich alles online zuegriffbar han, bin ich mit emene guete Stück Selbstbewusstsii trotzdem agstande und siehe da… au durecho.

Es isch de agnehmschti Corona-Tescht gsi, wo ich je gmacht han (obwohl ich das Wort „agnehm“ jetzt grad sehr grosszügig verwände). Es sind nur drü Drehige mit dem Stäbli dur dNase gsi und viel fiiner als susch. Normalerwiis fühlt sichs würkli so a, als würeds sHirn dur dNase dure usezieh.

Zum Glück simmer beidi negativ teschted worde und hend langsam chönne no meh Vorfreud zuelah.

DArlette und de Renato sind scho am Abig agreist zum i eusere Abweseheit bi eus zwohne und mir hend nomal dMimpi ganz bewusst gnosse, bevor mir abgreist sind.

Mir sind extra knapp 3 Stund früehner am Flughafe gsi, damit de Adrian no chan die letschte Theorieteil fürd Tauchprüefig chan läse. Die Extrastund hemmer denn aber bruucht zum näbem Antigen-Tescht und de zwei Impfige no es One Health Formular uszfülle wo eifach ned hett welle ände. Wie die Pandemie euses Läbe verändered hett…

Mir hend richtig chönne ufatme und no meh Vorfreud zuelah, wo mir im Gate acho sind und denn scho bald hend chönne ide total usbuechti Boeing 777 vo de Singapore Airlines istiige.

Normalerwiis gönd bi mir au 12-Stunde-Flüg wie im Flug verbii, aber mir hend beid chuum chönne schlafe und es hett sich echt id Längi zoge. Nach emene 3.5 Stunde stop-over am wunderschöne super fancy Flughafe in Singapur ischs mit emene 3.5 Stunde Flug nach Manila wiitergange, wo mir wiiteri zwei Ireiseformular usgfüllt händ mitem gliiche Inhalt wie scho im OneHealth-Formular. In Manila acho simmer vor de Passkontrolle uf all Corona-Nachwiis prüeft worde und froh gsi, wo mir denn würkli offiziell hend dörfe uf de Philippine acho.