De Tag isch absolut unglaublich gsi.
Nachem zmorge bini wider go schlofe da mer gester erst am 4i vom usgang zrugg cho sind.
Am mittag simmer denn zum strand und mit eme Motorboot 40min de Küste nah. Es ish gsi wie im Paradies: Sunne, de früsch Wind, gueti Musik und denn die atemberaubend Ussicht uf d‘Natur.

Nach 40min hemmer aghalte und hend chönne go schnorchle. I ha soooo vill wunderschöni Fisch gseh. Ganz grossi und au riise schwärm vo villne chline. Det bini den gege en Stei drückt worde vonere Welle, was d‘Verletzig am Bei erklärt. Ha aber no Glück gha, uf dem Stei het‘s nur so vo Seeigel gwimmlet, vo dene het mi keine verwütscht.

Denn simmer uf e Insle, hend gesse und Coco Loco trunke (Rum, Kokoswasser und Kokosmilch).
Nachher hemmer no chli Zit am Strand verbrocht bevor mer am Obe denn wider uf‘s Boot sind. Mer sind zu eme Ort wo de Plankton ide Nacht lüchtet und das ish so unglaublich wunderschön gsi, so öppis hani no nie erlebt. Mer hend wider schnorchel übercho und sind is Wasser. Alles isch dunkel gsi und wenn mer sich bewegt het hend überall chlini pübktlich avo lüchte. Uf Bilder gseht mer‘s leider nit würklich aber in Echt isch es absolut unglaublich gsi, ich bin richtig sprachlos gsi. Mer hend öppe 20min chönne det schwimme und i ha jedi Sekunde gnosse. Eifach nur wunderschön gsi.