_Geduldig sii_

Es mag chli usem nüüt cho, aber s Thema Geduld ploppt i letschter Ziit gad immer wieder uuf.

빨리 빨리 (palli palli)!
In Korea mues alles schnell goh, so beschriibts üs mini erst Lehrerin a de Sprochschuel.

Au wenn vill Lüüt würkli nöd so geduldig sind, bini immer wieder erstuunt, für was die im Alltag immer geduldig in perfekte Einerkolone aastönd: für de Bus, für de Lift, für populäri Restaurants und Cafés - sisch verruckt!

Me wartet lang und wenn mer denn dra isch, mueses schnell goh, dass alli andere Wartende au no zu ihrem Zug chömed.

Mir persönlich passt das palli palli-Motto eigentlich recht guet. D Abläuf funktioniered, me chunnt relativ schnell zum Zug und es wird meh oder weniger erwartet, dass mer Sache i de Umgäbig relativ schnell cha ufneh und Eis und Eis cha zämezelle!

I bi eifach gern zügig underwegs. Und glich würi sege lohni mi selte us de Rueh bringe. I würd nie uf en Bus renne, wenn i weiss es chömed jo wieder. Eis-ums-Ander denki amel!
Au wenns zu andere Mensche chunt, bini glaub relativ geduldig, aber i de letschte Täg hani glaub gmerkt, was so richtig a minere Geduld zerrt.

Erstens: Wenn Lüüt unglaublich langsam laufed oder us unerklärliche Gründ plötzlich im Menschefluss stohbliibet.

Zweitens: Wenn Lüüt so gar kei Initiative oder Verantwortig übernehmed, alli Entscheidige mir überlönd und für all ihri Handlige um miis Iiverstänis fröget.
Selber denke & für sich iistoh isch mer so wichtig, söss chunnt mer zu nöd vill!

Drittens: Wenn sich Lüüt ständig beklaget oder sich über irgendöppis sorget. So e durchs Band zoges Nörgele und Sörgele um immer di gliiche Sache und sich nöd aktiv bemüeh öppis z ändere chani eifach schlecht nohvollzieh.

Eimol meh hani gmerkt dass es mir so wichtig isch, dass mer weiss wa mer will, selber Idee het, selber denkt und chli Lockerheit aastrebt.