Nachera sehr heissa und ni so schlofricha Nacht, schället de Wecker trotzdem wia gwohnt am 6i. Für a knappi Stund stiegemr inda Camper und fahrend zuda Edith Falls im Nitmiluk Nationalpark, um döt de 2,6 km lang Leliyn Spaziargang go macha. Diesmol ischs erträglicher, es isch erst um dia 29 Grad und dia menschlich Klimaalag (lut Marc z Schwitza😊) funktioniart no. Es isch a sehr schöna Spaziargang ... andem mr a dena drü verschiedena Pools verbichömend. Im obersta Pool gönnemr üs a Abchüalig, bevor mr de wiedr dr Abaweg in Agriff nämend. Dz nöchsta Ziel isch dr Litchfield Nationalpark. Ufm Weg döt hi, machmr z Pine Creek no a Abstächr ufa Lookout, zum alta Bahnhof und inas Cafe zum wiedr mol a feina Cappucino gnüssa. Bim ersta Zwüschastopp im Litchfield Nationalpark bewunderemr und erfahrend Einiges zuda Magnetic Termite Mounds, also zuda magnetischa Termitahügel. Magnetischa Termitahügel, wega Nord/Süd-Usrichtig wegda Temperaturregulation. Bim zweita Zwüschastopp gnüssemr a Abchüalig ida Buley Rockhole und fahrend den schlussendlich zu üssem schön ruhiga Übernachtigsplätzli.