Hüt düsemer zitlich los in Richtig Kakadu-Nationalpark. Am Adelaide River machemer a erschta Halt und entscheiden üs noch langem Überlegga, zum a Bootstour z macha, wo ma Krokodil gseh sött. Nochemna guata Kaffi ischs denn so wit und das Bötli tukerlet dura eher schlammig Fluss. Nid lang und miar gsian ds ersta Krokodil. D Kapitäni hebt dem hungriga Reptil mitemna Prügel a Mocka Fleisch entgega und denn zack, schüssts usm Wasser. Unglaubli wia hoch das Tiar usm Wasser gumpa cha. Das dörfemer grad mehrmols erläba, dia Tour hät sich würgli glohnt! Noch dem Erläbnis fahremer witr zum Mamukala Wetland. Döt beobachtemer verschideni Vögel. Nochdem miar a Wili lang ruig gsi sin, chömen au d Wallabys us da Büsch. A zitli spötr chümr bi üserer Unterkunft a und planen nochera abchüalig im Pool üsera bis jetz no unplanta Reiseabschnitt.