Üses erst Ziel isch hüt Cahills Crossing im Nordosta vom Kakadu Nationalpark. Döt goht a Stross überda East Alligator River, was jo eigentlich ni speziell isch. Doch sobald dFluat isetzt füllt sich das ganza suss eher flacha Flussbett mit Wasser und überschwemmt dStross, dassma fascht nüm drüberd fahra cha. Dur dSteimur näbta Stross und dur d Stross an sich entstoht en Absatz und de nutzen Krokodil um döt gmüatlich ufd Fisch chöna warta, wo ebafalls überd Stross müand goh. Es isch as würklichs idrücklichs Naturspektakel gsi!
Zzweita Ziel isch dr Ubirr gsi, au döt hets nomol "Rock Art" ka und en wunderschöna Ussichtspunkt. Mit viel Glück hämr ez ändlich au mol churz es Kurzohr-Felskänguru gseh. Noch dem hämmr scho sehr vielmol Usschau ghalta, sie sind ganz schüchi Tiar, drum gsehtmas au ni viel.
Irgendwia simr au hüt biz müad gsi und sind üs drum zerst ni sicher gsi, wasmr am Nomi no macha söllend. Mr hend üs den entschieda doch nomol ins Auto stiega und in dia ander Himmelsrichtig zfahra. Dia lang Fahrt und de churz Spaziargang hen sich glohnt, de Barramundi Gorge isch hammr gsi. Was halt au was usmacht isch, dasses soo wenig Lüt het!😍