Ida letschta Täg isch viel glofa, drum hämr hüt gar kei Wecker gstellt. Zum Glück hets dur dNacht abküahlt, so hemr guat chöna schlofa. Dr ersti Stopp isch hüt ganz noch. Mr laufend nu ganz churz bismr bida Fortescue Falls achömend. Doch mr laufend direkt witr zum Fern Pool, womr üs de scho zerst mol im Wasser abchüalend. Ufm Zruggweg simr de glich auno schnell bida Fortescue Falls dri go bada. Ufm Weg gsehmr eimol meh a Flughundkolonie, wo üs wieder zum Stuna bringt.
Zrugg bim Camper heissts a Stündli quer durch da Karijini Nationalpark fahra, bismr de bi üsem nöchschta Ziel bim Hancock Gorge achömend. Döt heissts zerst a Leitera abachlättera damitmr in Gorge inachömend. Dr Wäg dura d Schlucht isch a richtig cools und wunderschöns Abendtür gsi mit Chraksla un Bächlidurquäriga. Es isch sehr spannend, wia jedi Schlucht wiedr sini Eigaheita het.
Gega Obet fahremr noch Tom Price, wo üsa Campingplatz für dia Nacht isch. Tom Price isch mit 747 M.ü.M dia höchscht glegani Stadt im Westaustralia und bekannt für d Eisenerzmine, wo vo Rio Tinto gfüahrt würd.