_Chind sii_

Au wenn Disney nöd so Teil vo minere Chindheit gsii isch wies für vill anderi Mensche isch, hets mi zrugg id Chindheit versetzt.
Peterson & Findus, Pippi Langstrumpf, Globi, Jan & Co., de Doppelhaas und wiiteri Gschichte sind mer wieder in Sinn cho. I glaub i ha meh Hörbüecher gloset als Film glueget.

Ad Chindheit denke, isch i mim Fall öppis mega schöös.

Als Chind wird eim meh verzeit, Fehler sind weniger e Makel, kein Grund öpper z verurteile. D’Erwartige ane Chind sind eifach gringer,s Verständnis grösser.
Als Chind cha mer sich wildi Sache vorstelle, sich i unwürklichi Charaktere ineversetze, mit Tier & Pflanze rede. Und währed dem mer da macht, lernt mer.

Isches nöd spannend, wie mer als Chind meh lernt drüber, wie mer sich moralisch richtig verhaltet als spöter im Läbe. Je älter das mer wird desto weniger spielt wie mer sich so z‘verhalte het, weniger e Rolle. S‘ grosse Wüsse über aktuelli Themene sind wichtiger.

Uf jedefall het de Walt Disney de Aaspruch a sini Gschichte gha. Gschichte sölled spannendi, einzigartigi Charaktere ha, sölled e moralischi Botschaft ha (chli wie Märli und Sage). Fürs volle Erläbnis sölleds ästhetisch dargstellt und mit epischer Musig begleitet sii, sodass sich jede Zueschauer cha i die Welt versetze. Chli wie VR ohni technischi Understützig eigentli.

Mit dem Aaliege het er sehr Erfolg gha, zurecht würdi meine. I mein wer will denn nöd en Kolleg vom Winnie Poo sii, de Olaf umarme oder mit em Micky Mouse uf Abentüür go.