Es hett es Ziitli bruucht bis ich da in Puerto Galera acho bin. De Adrian hett bereits am Tag nach de Akunft mit sim Open Water Tauchkurs agfange und ich han no en Tag Pause gmacht bevor ich agfange han tauche.

Es isch mega schön gsi, dass de Adrian und ich immer ufem gliiche Boot gsi sind und ich so immer mitbecho han, was er grad lernt und au sini Fortschritt als Taucher vo Tauchgang zu Tauchgang ha chönne beobachte. Er hett mega schnell glernt und ich finds so luschtig zgseh, dass er ganz andersch lernt als ich. Er wett immer alles ganz gnau verstah und ich mach ame eifach irgendwie.

Nach 5 Täg hemmer en Tagesusflug nach Verde Island (in Würklichkeit en Stei-Zylinder unter Wasser) gmacht. Ide Zwüscheziit isch de Stei-Zylinder voller wuuuunderschöne Koralle und hett gaaanz viel Fisch rundume. Normalerwiis nähmeds nur erfahreni Taucher det ane, wel anschiinene letschti drü Chinese dete verlore gange sind und bis hüt nümme gfunde worde sind. De Ort hett nämli sehr starchi Strömige und da muen mer sich scho sicher fühle bim tauche, damit mer au ned in Panik grated. Ich bin echt überrascht gsi, dass sie de Adrian mitgnoh hend, au wenn er zu dem Ziitpunkt noni mal sini Usbildig als Advanced Open Water Diver abgschlosse gha hett. Er isch mit sim Dive Instructor Oying inere Gruppe gsi und ich mitem Dive Master Robert und zwei Philippiner Emil und Andrea inere andere. Zum Glück! Wel ich en sehr usgeprägte Beschützerinstinkt han under Wasser. Wel Vollmond gsi isch sind dStrömige no stärcher gsi als susch! Und sie sind i all Richtige gange! Mängisch hetts e Strömig gege abe gha, wo mer hett müesse ufeschwümme und trotzdem am gliiche Ort steckebliebe isch.
Oder denn e halbi Minute genau umgekehrt, dass mer gege ufedruckt worde isch und sich hett müesse amene guete korallefreie Ort festchralle, damit mer ned plötzli ade Wasserflächi obe isch, wo dBoot hin- und herfahred. Einisch bini würkli churz nervös gsi, wo‘s mich abetriebe hett, wel bi sonere Downward Current anschiinend die drü Chinese gstorbe sind. Ich han scho chli Luft i min BCD (Tauchweste) tah gha, damit ich chli wiiterufetriibe und bin geg ufegschwumme, aber de Robert hett mir denn mit Handgeschtene gseid gha, dass das ned nötig isch und denn hani mi beruhigt. Zwei anderi Mal han ich dAndrea und de Emil gholfe ned vo de Strömig wegtriebe zwerde und wenn ich mir vorstelle, dass ich no de Adrian ide Nöchi gha hetti, wäri chli überfordered gsi. Er und de Oying sind scho wiiter vore gsi.

Das tönt jetzt alles so dramatisch, aber es sind drü wunderschöni Tauchgäng gsi und es hett sich sehr glohnt zum de Tagesusflug zmache. Es hett ganz schöni soft corals gha und viiiel meh Fisch als dete wo mir susch tauched. Traumhaft schön gsi! Nachem zweite Tauchgang hemmer au uf enere chliine herzigi Insle gässe, was au so schön gsi isch. Zwei Fraue hend für eus grilliert. Und de Adrian isch würkli guet worde bim tauche. Er hett alles sehr schnell glernt und mit jedem Tauchgang meh Freud am tauche.

Ich bin au mega froh, dass er imene 5-Stern-Tauchcenter sini Usbildig hett chönne mache. De Oying taucht sit 20 Jahr und nimmt all Üebige ernscht und macht sie gnau dure mitem Adrian. Mer merkt au susch, dass die 5 Stern total verdient sind. Es wird alles für eus parat gmacht und mir müend nur dete sitze und sie bringed euse Tank mitem BCD und ehm Regulator ane und helfed eus alles azlegge. Wenn mer fertigtaucht sind helfeds eus ufs Boot cho und ufem Boot chömemer es warms Frotteetuech über zum euses Gsicht zputze. Es hett au immer Wasser und Biskuits parat ufem Boot. Mir müend selber a nüüt denke. So schön 😇😄

Au de Service im Hotel isch perfekt! Sonen guete Service hend mir beidi no nie erlebt - und denn no 24 Std/Tag! Sie begrüessed eus immer bim Name und merked sich, was mir ame bstelled. Sie sind sehr ufmerksam, fründlich und zuvorkommend. Wenn mir am Pool sind müemmer nur es Chnöpfli nebe eus drucke und es chunnt eus öpper cho bediene. Mir müend ned mal ufstah zum öppis zum trinke hole. Und zu jedem Getränk chömemer au grad automatisch Wasser mit Zitrone und Iis über - und das no gratis! DWösch werded eus au gratis gwäsche, tröchned und gfaltet und vors Zimmer bracht. Eus gahts also würkli guet.

Puerto Galera, bzw die chliini Stadt nebedra isch eifach ned so schön. Fühle mich ned so wohl da. Ich gsehne oft die alte Manne mit de junge philippinische Fraue und ha eifach keis guets Gfühl, wenni dur die Stadt lauffe. Es hett au viel Strasseverchäufer, wo irgendwelchi Chetteli oder Sunnebrüllene wend verchauffe. Mir tuets immer so Leid nei zsäge, wels eifach ned viel Tourischte da hett. De Adrian und ich sind oft die einzige Gäscht ide Restaurants.
Und woni mal bin go schnorchle hani en Free Diver gseh under mir im Wasser wo mit emene Speer Fisch gjagt hett und die gfangene lebändige Fisch an Rugge bunde hett. Ich han ihn scho bös agluegt und au welle de Schimpfifinger zeige, ha mi denn aber zruggghebt - zum Glück. Wel de Oying hett mir denn verzellt gha, dass es paar Lüüt sit Corona würkli au nüüt meh zum ässe hend und drum agfange hend fische. Das hett mir denn so Leid tah.

Han mir denn au überleit, öbi eifach so bitzli Pesos wett de Strasseverchäufer geh und ha drum mitem Manager vo eusem Hotel gredt. Er hetts aber kei gueti Idee gfunde, wel sie denn no ufdringlicher werded und es sogar erwartet. Und er hett vielne anschiinend scho en Maintenance-Job abote, aber sie hend ihn ned welle aneh und so viel schaffe. Das hätti ned denkt. De Manager hett gmeint, dass sBeschte isch, wenn ich diheime verzelle wie toll dPhilippine sind und allne säge, dass sie selled da anereise. Das Hotel hett 60 Agstellti und die chönd dur ihre Job all ihri Familie durebringe und mir unterstützed dPhilippiner uf die Art und Wiis. Das Gspröch hett mich beruhigt gha. Vor allem dass ja Jobs umewäred, wenn sie würed welle meh schaffe. Drum möcht ich somit nomal understriiche, dass dPhilippine würkli super schön sind! E ordentlicheri, pünktlicheri, strukturierteri und englisch-sprächendi Version vo Indonesie 😃 Obwohl Indonesie halt au super schön isch und sehr viel zbüte hett. So, min Job isch somit erledigt 😇

Sabang hett leider ned so viel so chliini Restaurants wo mir authenischs Ässe chönnted becho. Und ich ha eh verlore mit mine Ässgwohnheite. Es hett selte es vegetarischs Gricht (geschweige denn vegan) und ich mue immer nach enere „Extrawurscht“ fröge, damit sie mir es Gricht vegetarisiered. Oft sägi „no meat“ und denn frögeds „but chicken is ok?“ und luegeds gschockt, wenn ned mal Fisch ok isch 😬🙈 Aber das isch jetzt mini Mission. Mission „Umdenke-arege“ und „Bedarf-nach-vegetarische-Gricht-erhöhe“. Was mich sehr überrascht hett, isch, dass ned mal dSingapore Airlines e vegetarischi Option gha hett. Also ich bi ned nur überrascht gsi, ich bi schockiert gsi!! Das hetti nie denkt binere internationale Airline ide hütige Ziit.

Es hett ja allgemein wenig Tourischte momentan da. Und wenns welchi hett, denn sinds vo Korea, China oder Japan. Es hett drum au viel koreanischi Restaurants da. Koreaner fiired oft bis lang id Nacht und tüend Karaoke singe - wie au dPhilippiner.

Zämegfasst: Mir gnüsseds da! Mir werded so verwöhnt und hend Freud am tauche. Mir hend bis jetzt trotz Regesaison so guet wie immer schöns Wetter gha und sind dankbar, dass bis jetzt alles klapped hett.

Jetzt gahts ab nach El Nido! 😃