_Uufbruchstimmig_

Chum zwei Wuche wieder dehei,
seg i au scho wieder byebye.

Scho sicher 4 Johr red i etz vome Ustuuschsemester in Korea.
I freu mi sehr, bi au scho lang parat und glich isch mer s Tschau-Sege schwieriger gfalle als denkt… Es git nüüt Schöners als Vorfreud, da macht alles chli liechter. Es isch definitiv Ziit für en abentüürlichere Läbensabschnitt, i gspüür s Risse immer stärcher.

D Wohnig in Luzern verloh, putzt und abgeh,
au vo de Julia heissts Abschied neh.
Aber me bliibt sicher im Kontakt, si het etz gad au gmeint, dass sie wieder uf Luzern zieht im Oktober. So gseht me sich denn sich wieder, schliesslich wärs au min Plan wieder döt zrugg zgoh.

S‘ Packfieber hört do aber no nöd uuf. Statt alles i miis Möslizimmer verstaue, packi gad direkt e Täsche fürs Sola und denn e anderi scho für Korea. I gwaggle no chli i de Schwiiz umenand, wer weiss, wie lang dasi denn wäg sii wird.