Am 4i am Morga gohts no halb verschlofa wietr zu üsem nöchschta Ziel nämlich noch Bukit Lawang uf Sumatra. Alles isch plangmäss ufganga und miar chömend tipptopp z'Medan ah und wärdend vom Chauffer empfanga. Uii wia dia do fahren... ob links, rechts odr ir Mitti spielt kei Rolla, ma fahrt eifach und sus gits jo no d Hupi. Das sind viar langi Autofahrtstunda gsi mit sehr vielna Idrück... eifachi Hüser, sehr vieli Roller, hufa Abfall überall, Palmplantagena, Schlaglöcher ida Strossa, und und und... Z'Bukit Lawang acho simr de mit Roller zum eifacha Hotel brocht worda und sind den biz go umalaufa. Es het än Märt gäh ziemlich ihr nöchi womr au häraglofa sind, doch mr sind uf Weg so viel "komisch" agluagt worda, dassmr de chum a Blick id Strossa vom Märt gworfa händ. So müad vodr Reis mit so vielna Idrück und no innera anderna Kultur womr noni kennt, simr de liebr wiedr ins "Tourischtaviartl" zrugg.