Am nöchsta Morga machemer üs ufa Wäg für z zweitägiga Dschungel-Trekking. Zemma mitera Dütscha Touristin, am Guide und sinem Handlanger laufemer nid lang, bis miar dr erst Orang-Utan dörfen beobachta. Unterwägs gsehmr verschiedeni Arta vu Affa und a unglaublich vielfältiga dichta Wald. Gässa hemr uf Wäg sehr viel und au sehr guat, erstundlich was dia 2 Guides für üs alles mitträgen. Miar sin beidruckt vum Gländ, wills doch sehr abwechsligsrich und hügelig isch mit da verschiedena Täler. Gega Zvesper erreichemer z Camp am Fluss. Noch dr abchüalig im Fluss giz Tee und Mütsch und a "spicy ass"😂. Währendem Znacht a wunderbari Gwitterstimmig, miar sin froh, dass dia chlina Hüttli dicht sin. Noch dr Nacht im eher härta Dschungelbett und emna feina Zmorga spazieremer zumna Wasserfall. Noch dera erfrischig, erholemer üs no as biz im und am Fluss bevors Zmittag git. Zum Abschluss raftemer flussabwärts zrugg zum Hotel. As unvergässlichs Erlebnis ischs gsi!