Wieder eimol meh heissts ab ufs Schnellbötli, diesmol gohts zur Partyinsla Gili Trawangan. Üsm Guide Zio sini absolut Liablingsinsla. Es isch a ziemlich chlini Insla, uf dera es nu Velo und Rössli mit Kutscha git, also kei Motorfahrzüg. Ds Meer isch fascht scho kitschig blau und türkis, doch leider chama fascht nianend eifach so dri go bada, wels überall Koralla het.

Am erschra Obet hemr de üsni eigna Drohteseli gsattlet und sind de Sunnaundergang go luaga, dura Fischmärt glofa und de no dr Rest vor Insla umfahra. Am nöchsta Tag stoht de Schnorchelusflug ah mit drü verschiedeni Stopp zum drigo. A unvergässliches Erläbnis! Am Obet isch de Pub Crawling agseit, vo Pub zu Pub go,Gmeinschaft ihr Gruppa gnüssa, Tanza und Trinka. Jetzt wüssemr wieso dr Zio so a Fan vo dera Insla isch.
Am Tag druf heissts relaxa, viel meh als Party oder eba relaxa chama uf dera Insla au ni macha, doch nüt tua isch üs de doch zblöd. Also hämr eifach wieder mol Ziet z'zweita und chli Bewegig gnossa und sind gmüatlich um d Insla glofa. Dura Tag hämr de doch no meh gseh, als am ersta Obet mit da Velo. Am Obet hemr de mit da Gruppa no a Chochkurs ka.