Hüt flitzemer mit 3 chlina Privatbötli uf d Insla Lombok. Derbei flügemer halba über dia grossa Wella. Do macht ma automatisch Morgagymnastik, wema nämli stif döta sitzt, giz Ruggaweh wenn z Bötli widr gega dia nöchst Wella prallt. Noch dem wilda Rit gohts mitm Bus richtig Inselmitti. Dr Wäg döt hi isch ganz speziell und glicht anera Passfahrt ir Schwiz, eifach unterhalb vur Waldgrenza. Am Rand und uf da Leitplanka vu dera gächa, kurviga Stross werdemer vu vielna Affa beobachtet. Dia löhn sich aber nid witers störa und sortieren ihri Lüss am Strossarand. Noch 2 Stund erreichemer üsa Mittagshalt womer aschlüssend 15 Minuta zu 2 schüna Wasserfäll spazieren. Wia ächti Tourischta werdener mitm Roller zrugg zum Bus gfahra, obwohl sicher 2 vu üs gära nomol a biz gloffa wären. 😅 Gega zVesper chümr bi üserer Unterkunft z Kuta a und gnüssen dr Pool und a feins Barbecue-Buffet.
Am nöchsta Tag bsuachemer dr Sasak-Stamm, a ganz speziells und intressants Erlebnis:
- Dia meista Stammaghöriga sin Riisbuura, alles füra Eigagebruch
- Dia eher ältera Lüt wüssen ihres Alter nid, sie sin denn eifach X-Riiserntena alt
- hürota tuat ma do nu Cousin/Cousina, ma dörf au öpr auswärtigs abr das hets bis jetz nid geh sägens
- d Böda im "Hüsli" werden mit frischem Chuaflutter putzt, einersits wegen Glauba, anderersits wür dr Boda mit Wasser weich werda

Nochdem Bsuach entspannemer üs alli am Strand. Am nöchsta Morga verabschiedemer üs vur Reisegruppa und gnüssen dr agfanga Tag z zweita am Pool.