Hüt stoht a Usflug in Regawald bi Kuranda a. Mitemna Uber gohts vum Hotel zum "Terminal Smithfield", wo Talstation vur Regawald-Seilbahn isch. Nochdem miar a guati Halbstund wegemna Systemabsturz vur Buachigsfirma gwartet hen, kriagemer nochm zweita Telefonat endli üseri Billet für d Bahn. Dia füahrt üs oberhalb vu da Baumchronena zu da zwei Ussichtspünkt: Red Peak und Barron Falls. Leider himr kai spezielli Tiar gsichtet. Dr Wasserfall isch din aber selbst für üs Schwizer sehr idrücklich gsi. Ar Endstation z Kuranda erlebemer a wunderschüna Spaziergang dura Regawald. A Stuck vu üsm Weg füahrt am Barron River entlang, wos ahgeblich Süasswasserkrokodil geh söll. Leider himr a kais gsichtet, drum himr din halt a Kaffi und a Glace gnossa bis üsa Zug sött fahra. Tatsächli isch din de Zug au gfahra, nochdems zwüschazitlich ghaissa het d Strecki seg ez zua bis uf witeres. Schwein ka wür i sega! A erlebnisrichi Fahrt erwartet üs in Nostalgiewäga bis uf Cairns.