_Reisegwohnheite_

Scho spannend, wenn mer so mit öpperem underwegs isch wo mer nöd so kennt & söss au nöd unbedingt vill Gmeinsamkeite het.

Wie eim gwüssi Sache eifach egal sind, wo am andere mega wichtig sind. Mir zum Bispiel s Geld woni für s Busfahre usgib. Oder wie mer sich e gwüssi Art z’übernachte eifach überhaupt nöd cha vorstelle.
Oder wie mer a bestimmte Ort, wie eme
überdachte Markt eifach no nie i sim
läbe gsii isch.

I ha hüt eimol meh denkt, wie fest Freud, dassi am Reise ha und wie dankbar dass i da scho so früeh ha dörfe entdecke.
I cha drum so locker underwegs sii, Sache uf mi zuecholoh und mi über grimmigi Mensche nöd zfest ufrege.

I cha packe, so dass es relativ gmüetlich isch, s Gepäck au mol mitzträge oder ufs Velo packe - Optione offe bhalte isch miis Motto.

I cha mit chli regere Marktsituatione umgoh und mi innere Warteschlange duresetze.

I cha Lüüt beobachte und mir so abluege, wie mer sich do so verhaltet ohni öppertem uf d Füess ztrette.

I cha en unzfriedne Buschauffeur, wo üs versuecht z sege, dass mer gfälligst nöd sölled schwätze i sim Bus ernst und au chli mit Humor neh.

I cha mer vorstelle ufme Campingplatz z übernachte oder au nur innere Hängematte.

I cha mi guet informiere, was mer so cha mache i de Umgäbig und so en Plan schmiide, wo üs beidne passt.

I fühl mi relativ sicher & ha s Vertraue, dasses meistens scho irgendwie guet chunnt.

Die Sache hani alli vo üsne Parentes glernt und au s’Cevi het sicher gholfe✌🏼🥰 zuedem isches jo nöd s erste Mol woni so underwägs bi