Jehh, ändlich wiedr mol a Tag a dem mr sichr meh erläbend als nur schöni Landschafta.
Mr fahrend nie lang bügemr richtig Limmen Nationalpark ab und gsehnd a hufa Wallabys. DStross isch ändlich wiedr mol chli abentürlicher. 😊

Domr zietlich so guat dra sind, entscheidemr üs zum spontan no en Wasserfall go aluaga. Doch da isch ni dia bescht Idee gsi, ni lang ischs ganga hets üs uf dem eigentlich guata Strossaabschnitt dr Reifa tätscht. Es het jo müassa cho, suss wärs jo kei richtiga Outbacktrip. Zum Glück hemr jo zwei Ersatzrädli dabi.😉 Doof isch eifach, dass mer no spöter händ chöna chera well dr witer Wäg gsperrt gsi isch. Also ischs as sinnloses Usfährtli gsi.
Um da Mittag uma chömr bi üsem usgstorbna Campingplatz "Butterfly Falls"ah, dussa hets ez öpa 40 Grad. Miar luagend Infotafla ah und überlegend üs, wasmr bi dera Hitz no macha söllend. Noch langem Überlegga entscheidemr üs no zuda Butterfly Falls zlaufa, händ abr biz Respekt. Mr packend dr Rucksack mit 3 Liter Wasser und laufend los. Noch 80 Meter chömr bida Wasserfäll ah. Wer läsa und es sichs merka chönt wär klar im Vorteil.😂 Wia müand miar üs de usrüschta wemr no länger go laufa gönd?😂

Wellmr immer no schön viel Ziet händ hollemr öpis vor, was für mora plant wär. Also fahremer richtig Western lost City. As Örtli woma nur mitemna 4WD hära döf, ma a Code brucht zum inacho und sich inas Logbuach i und usträga muass. Dr Marc het natürlich ei Freud a dem Weg, wo sich mit da Ziet no recht zogga het, welma so langsam unterwegs gsi isch. Doch es het sich glohnt, denn dia viala Sandsteiformationa sind sehr idrücklich gsi.