Ufm hütiga Plan isch a Morgaspaziergang, nämli dr Yardie Creek Trail. Drum simr früa us da Fädara, miar wün io schliessli no a paar Kängurus beobachta und dRuah ohni Tourista gnüssa. Und as lohnt sich absolut, miar chün uf Wäg a paar Schwarzpfota-Felskängurus, Fruchtfledermüs, Kakadus und a Fischadler beobachta. Au d Landschaft isch wia imna Traum - so stellt ma sich Australia vor: atemberaubendi Landschaft, wenig Lüt, fantastischi Tierwält! Aschlüssend fahremer nomol a rächts Stugg bis uf Coral Bay. Döta probieremer a dem wunderschüna Strand a drift-snorkelling us. Das mir Strömig und em triba loh funktioniert wunderbar, aber leider sin d Koralla sehr bleich, wegm Unwetter im Johr 2022. Miar gsian abr doch dr eint odr ander Fisch.
Am Obet gnüssemer a lokali Mohlzit und gün zfrida und müad undari.