Nochem üblicha Campingzmorga fahremer hüt früa los zum Nambung Nationalpark. Ufm Wäg gsiamr sogär no Kängurus am Strossarand grasa. Am 7i simr din schu am ersta Tagesziel, bir Pinnacle Desert. Wunderschü wia dia Chalchstei-Formationa vur Morgasunna beschuna werden. Z früana Ufstoh het sich uf jeda Fall glohnt, um dia Zit simr nämli no ganz allai. Einzig a paar Rosakakadus treffemer a. Nochdem miar nomol 3 khörigi Kängurus gseh hin, goht üsi Reis witr Richtig Lancelin. Döt achu gönnemer üs no a paar Chüalschrangg-Räschta, heisst a hufa verschidena Salot. Nochem Bsuach bim chlina Surfer-Lädeli, wo schu Wiahnachtssacha ufghängt werden, gönnemer üs no a Kaffi. Im Aschluss fahremer zu da Sanddüna, wo miar a stündigi Quadtour unter "strenger Ufsicht" gnüssen. Bim Sandborda dernoh himr din richtig dr Plausch ka. Döt ir nöchi übernachtemer im Camping, as schmeckt zimli noch gärendem Seegras, abr isch sus no gmüatli gsi.