_Wandere, Denke, Verstoh_

Das Wuchenend hani wieder chli Ziit für mii. Mini Friends sind nämli in Japan zum ihres Visa erneuere. I huuse i üsem 집 („jib“) in Gangnam und gang chli go laufe. Bim Laufe chani de Gedanke Ruum geh, Gedanke über mini Mitwanderer, über mii und Gott, miis Läbe, mini Fründe, wani will & nöd will, wani guet find & wani schlecht find. Und immer wieder chani stoppe und d Ussicht bestuune, isches nöd schöö!

Uf di eint Siite fähled mer mini Fründe gad chli. Uf di ander Siite gnüssis au, mi wieder mol chli chöne uf mi z’fokussiere. D’Nübar und ii telefoniered zwor fast täglich, s git eifach immer vill z’verzelle! S het ebe gad chli e Drama geh i üsere Gruppe. De Wüssensstand drüber, wer etz was, wenn, mit wem gmacht het und wer wa weiss oder versuecht z’verheimliche, isch Thema Nummer 1. I mue sege, dass is gad zimmli spannend find, obwohl oder vilicht au grad will s mi nöd würkli betrifft.

D‘Lüüt redet mit Lüüt und so macht‘d Rundi. I weiss nöd mol, öbi find dass zvill gredt wird, will s Problem isch genau s Verheimliche. Da wür heisse, dass ebe genau zwenig gredt wird. Es wird eifach mit de falsche Lüüt gredet, will mer versuecht de Konfrontation uszwiiche.

Folgends Bispiel:
D’Nahara und d’Nübar wohned etz zäme im Gangnam-Dehei. Beidi beklaged sich bi mir über Sache, wo sii am andere störe. Und wenn i ihne seg, si sölled da mol mitenand berede, meined beidi "aber i weiss nöd wie, nochher isch si hässig uf mii". Und so wird usere Mugge wird en Elefant und i bi zwüsched ine. I ha mini Rolle als Mediator etz aber akzeptiert und has etz sogar gschafft, dass di beide mitenand gredet hend, wuhuu! Und so lebets etz wiiter, glücklicher wie je zuvor.

Us em elei sii für e wiili und etz wieder vill um mini fründe sii hani glaub verstande: Im Eleisii d Wiisheit, usem Zämesii chunnt d Inspiration,

Drum wötti Beides!