Am 6 am Morga heissts hüt ufstoh und ohni zMorga go laufa, ir Hoffnig nomol so chlini süassi Felskänguru z gseh. Bi dem Rundweg gohts zerst biz duruf zur Ussichtsplattform, bi dera ma schön ufd Ormiston Gorge gseht und de witr ins Tal ina. Zhinderscht vor Schlucht acho, simmr scho fascht chli entüscht, dassmr no kei Tiar gseh hend (usser a hufa schöns Vogelgezwitscher köhrt), denn miar händ viel Plätzli gseh, womr vermuaten söttis Felskängurus ha.
Doch plötzli hüpft öpis davo.😍 Ufm Zruggweg im Gorge dura döfemr de glich no ganz vieli Felskänguru beobachta.😍 Es isch scho idrücklich, wia dia tarnt sind und wia dia uf dena Felsa umahüpfend.
Zfrieda und dankbar essemr zmorga und machend üs nochert ufa Weg richtig Hermannsburg. Döt müamr a Bewiligung go hola füra Mereenie Loop, well de durs Land voda Aborigines füahrt. Bevormr de döt durafahren machmer no en Abstächer ins Palm Valley. Nu scho dr 4x4 Track in das Tal het wiedr richtig Spass gmacht, denn ma fahrt dura Sand, sehr steinigi Stross und über löchrigi Felsplattana. D Natur döt isch au mega schön, doch mr hend nu Ziet für a churza Spaziargang. Nochert heisst überda Mereenie Loop richtig Pertermann fahra. De unversiglet Weg füahrt üs au wiedr dura mega schöni Landschaft, woma a huffa Herda vo wilda Rösser gseht, ab und zua as einsams Esali und teils Chüahherda, wo abr en Besitzer händ. Wildi Kamel hämr leider kei gseh. Churz vor Petermann scho im Watarrka Nationalpark acho, gsehmr no zwei Dingos.
Dia Ziet vergoht amigs so schnell, dasses de scho avo idunkla het, womr de no Znacht gessa hend.