Miar schlofen hüt a mol a biz länger bis am halbi 8i. Dernoh fahremer a chlis Stückli und laufen zuda Kathleen Springs. Miar gnüssen d Ruah zwüschet da Felsa, em chlina Tümpali und da Trimmer. Das sin dia ersta Ranger, womer am Wärch gsian. Währed ihrera Znünipausa gspröchlemer mitna. Nochdems erfahren, dass miar noch guat 7 Wucha Australia no kai Schlanga gsia hin, gins üs dr Tipp zum gega Obet no in Kings Creek laufa, döt hegs schins hüfa.
Miar Zmittagen spötr im Reschti vorm Camping und planen döt no üsi Ostküstareis. Wos din nüma so heiss gsi isch, machemer no gschwind dr 6km lang Kings Canyon Rim Walk. Miar gnüssen d Landschaft mit dena speziell rota Felsa, wo vur Obetsunna tiptop beschuna werden und dia Ruah, öpis unglaubli schüs. Zrugg vu dem Rundwägli gohts nüma lang bis dunkel isch. Miar laufen din no a stügli mit da Stirnlampa in Richtig dem empfohlna Kings Creek. Tatsächli gsiamr din a paar vu dena Reptil, zu mim Glück abr nu chlini. 😄