Hüt verlömr Alice Springs und fahrend zuda East MacDonnell Ranges. Dr ersti Stopp isch Trephina Gorge, womr a 2,5km langa Panoramaspaziargang machend. Gega Schluss simmr de froh, dassmr bim Auto achömend, denn es isch scho wiedr recht heiss bi 39 Grad und bimna warma Wind. Zunanand segmer, dasmr hüt glaub nüma gross laufen i dera Hitz und überlegend üs, wasmr ez no machend. Mr entscheiden üs füra 4x4 Track und fahrend zum Arltunga Historical Reserve, dia erst ehemolig Stadt vo Zentralaustralia. Miar hend in Australia jetzt scho einigi Kilometer zrugggleit und verschiedeni schöni Landschafta gseh, doch döt dura zfahra het üs wiedr mol zum Stuna brocht. Es isch so a unbeschriblich schöni Landschaft mit Hügel und "Berga" wiamrs nonia hend gseh!
Döt bim Reserve acho, gsehmr dases auno alti Mina het, also gömr gstärcht nochmna Wrap, zerst dia go aluaga. Dr "Weg" zeigt 150m dr Hügel duruf. Doch es gseht überall nach Weg us und uströchnet oba acho wärdemr leidr ni belohnt, denn miar händ d Mina ni gfunda, au mitda Drohna ni.😂 Ufm Abaweg laufmr zum Glück de doch no anda Minaigang hära. Miar händ aswia a Pit erwartet.
Witr uf dem Rundweg gohts zuda Ruina vo 1887. Vor Stross us fahrtma direkt zur alta Polizeistation hera und cha nochert a Kilometer hinderalaufa, zum no dr Rest vor Stadt zgseh. Jojo, zwei Kilometer mögemr ez schono.. hahah schön ischs eifach nüma, wenn no soo a heissa Wind goht. De frogt ma sich scho, wia dia Lüt das damols gmacht händ, wo wärendm Tag i dera Hitz bispielswis gschmidet händ oder Gleis füra Ghan verleit händ.
Jedafalls hämr de dia alta Hüsli no agluagt und sind wiedr zruggglofa.
Im schöna klimatisiarta Auto gnüssemr dr glich Weg zrugg uf Alice Springs nomol. D Obetstimmig macht genau no zTüpfli ufm i us.