Dia Nacht hemr gschlofa wia Engali, wellmr so müad gsi sind. Nachm zMorga fahremr zum Uluru, schnappend döt üsi Velo und radlend eimol uma Uluru uma, dass sin nu öpa 10,5 km. Ufm Weg zringsum chama eimol go z Mutitjulu Waterhole und d Kantju Gorge go aluaga. De gross rot Stei vo allna Sita zgseh isch schono idrücklich.
Nochdemr dVelos wiedr abgeh händ, gnüssemr as langs Käffeli und plaudern ewigs lang über Gott und die Welt. Ufm Retourwäg luagemer no binera Kamelfarm verbi. Zrugg ufm Camping heissts wiedr mol Wösch macha und gönend üs de no a Abchüalig im Pool. Am halb 6i wärdem abgholf fürs "Field of Light Dinner". Mr fahrend zumna Ussichtspunkt, woma ufa Uluru gseht. Miar bechömend döt en Apéro, bevors de zum Dinnerplatz goht. Eigentlich hämr denkt, dases Zweiertisch sind, doch leider sinds grossi rundi 10er Tisch. Usemna erwarteta romatischa Znacht, wird ez halt a Obet mit Gspröch mitemna japanischa Päärli, vodem ma nu en Viartl vestoht und dr erst errohta muass, zwei guat englischsprächenda Australierinnen, wo ursprünglich us Vietnam chömend und einera Koreanerin, wo au fascht kei Wort Englisch cha. 😂 Nochm zNacht wo ganz okay gsi isch, spielt eine no ufm Didgeridoo as ständli, duras Teleskop chömr dr Saturn mit sina Ring aluaga und en Astrolog verzellt no einiges über de schön Sternahimmel. Drnoch chunt für üs z Highlight, mr chönd durs Field uf Light laufa und gnüssend chli dZweisamkeit.