Hüt wär eigendli bi Zita ufstuh ufm Plan gsi, abr womer a biz vorm 7i zum Fister usi luagen, macht üs z Rägawättr nid aso a. Z erscht Mol dia Feri dräemer üs nomol um und schlofen linger als eigendli vorgnu. A wilali spötr machemer üs bi richtigem Rägawättr uf wäga. Eigendli gnüssemers richtig, es isch nämli z erscht Mol sitem Augschta, womer richtigs Rägawättr erleben. Miar chün nochemna zitli bi da Josephine Falls a und laufen döta dura Rägawald. Mittlerwila saichts nüma und miar gnüssen a spontans Bad im Bach. Zrugg bim Auto fohts gad widr a Rägna, Schwein ka wür i säga. Witer gohts uf Etty Bay, döt am Strand söllma Cassowaries gseh, sägen dia Iheimischa. Leider gsiamr abr a kai, vermuatli ischs au dena z leid Wättr zum an Strand gu, obwohls mittlerwila nuno ab und zua a biz tropfet. Miar gnüssen döt a paar Nudla und fahren widr zrugg ufa Bruce Highway. Und siehe da, am Strossarand gsiamr ufm Zruggwäg zwei söttig Vögel. Witr gohts zum Mission Beach, a chlis Örtli und a hübscha Strand. Miar nün a Kaffi uf Wäg und luagen no bim South Mission Beach verbei. Ufm Wäg gsiamer nomol Cassowaries, sogär eimol no zwei Jungi. Z Townsville achu gümr sofort in Znacht, noch so viel Kilometer het ma schliessli Hunger.😉