Au hüt Morga zwingt üs z Wetter scho fascht biz zum länger schlofa. Denn bi Räga ufstoh und uf dFähra goh macht üs ni so ah, drum stellmr dr Weckr nochemna Blick usm Fenstr nomol neu.
Am halbi 10 gömr de bi trochnm Wetter ufd Fähra und gönd richtig Magnetic Island. Döt acho machmr üs schnell ufda Weg, odr bessr gseit weg voda Menschamassa. 😂 Mr entscheiden üs für a grösseri Wanderig, ir Hoffnig chli allei zsi. Es isch a schöni ruhigi Wanderig dura Nationalpark, wos ufa und aba goht. Dr Rega vor letscht Nacht und dia Wolkadecki, wo immr no am Himmel isch, loht das tropischa Klima no extremr wärda. So tropft üs dr Schweiss wortwörtlich scho noch chürzester Ziet überall durab, wonr nu cha. 😂
Miar wärden abr au belohnt, denn mr gsehn a Koala und a Wallaby uf dera Wanderig. Drnoch machmr no a chürzera Weg ebafalls durna Nationalpark,i dem Gebiat sötts viel Koalabärli ha. Mr entdeckend insgesamt sieba süassi Koalas und händ üs eifach jedes Mol wiedr ufs neua gfreut a witera zgseh.
Uf dem Weg hets zudem auno schöni Ussichtspünkt, woma au hüfig uf dia schöna Stränd abagseht odr teils au abalaufa chönt. Bi teilna Stränd chönti ma vom Strand us go schnorchla, doch mr händ üs wegm Wätter und da Quallagfohr dagega entschieda.
K.O. dur das tropischa Klima, nämr no dr Bus zum Horseshoe Bay und gnüssend döt as chalts Getränk und a feina Kaffee. Drnoch gohts mim Buss zrugg richtig Netty Bay, womr de wiedr ufd Fähra umstiegend. Nochera halba Stund chömr wiedr in Townsville a und gönd zrugg ufa Camping go duscha, chocha, blogga und schlofa. So goht scho wiedr a witera wunderschöna Tag zend.