ZWetter gseht hüt ni so guat us, drum issemr z zMorga dina. Für üs spilts hüt kei Rolla, dass es regnet, denn zerst stoht hüt bi üs Brauerei Bundaberg ufm Plan. Wemr scho dia ganz Feria zGetränk Bundaberg Ginger Beer trinken, mr scho z Bundaberg sind, isch es jo scho fascht ein Muss.😊
Döt acho startet das Ganza mitemna Tasting. Währenddem mr dia 13 verschiedeni Bundaberg-Softgetränk probiarend, verzellt sie immr wieder biz öpis zuda verschiedena Gschmäcker. Drnoch chömr no dur dUstellig laufa, wo unteranderem dr ganz Brauprozess ufzeigt. Vor mer witergönd döf jeda vo üs no en Sixpack selbr zemmastella. Jetzt wüssemr wasmr ida nöchsta Täg trinka müand. 😉
Drnoch gömr spontan no zunera Macadamia Farm. Au döt döfemr verschieda zuabereiteti Macadamia probiara, bevor mr au döt meh über Gschicht vo dera Farm und allgemein meh über dia Nuss erfahrend. Bi dem herziga Restaurant, wo umgäba vo Macadamiabäum isch gnüssemr no as Kaffee und a feina Macadamiabrowni. Drnoch heissts witrfahra, denn üses hütiga Ziel isch dr Rainbow Beach. Dr Weg döt hi isch wiedr mol biz andrsch, denn mr fahrend lang dur riesigi Nadelbäumplantagena. Churz vorm Ziel, gsehmr wiedr mol en Dingo. Nochm ichecka ufm Camping spaziaremr no chli dur Gschäftli und laufend no chli am Strand entlang, bevormr üs de wegm Rega i Camper verchrüchend.