Dia churza Schönwetterphasa hämr hüt usgnutzt. No bi schönem Wetter essmr zMorga dussa und gönd zumna Ussichtspunkt, vo dem ma dr Rainbow Beach no vo oba gseht. Zudem laufend mr de no zuda Carlo Sand Blows, a riesagrossi Sandflächi odr eba Sanddüna. Drnoch heisst ab zum nöchsta Örtli fahra, es isch eis womr scho kennend nämlich Noosa. Im 2018 hani döt drei Mönet verbrocht und am Marc hani das Örtli de uf üserer ersta Reis au döfa zeiga. In Noosa acho heissts zerst mol en Campingplatz für zwei Nächt suacha, denn de womr händ wella, isch usbuacht gsi.
Womr de eine gfunda händ heissts sofort zum Main Beach go, go luaga ob am Marc sin gliabta Glacewage no döt isch. De isch tatsächli döt gsi drum hämr üs gad öpis müassa gönna. 😊 Mr sind de mit dem feina Getränk gmüatlich an Strand ghöcklet, bevor mr de zrugg ufa Camping go chocha und ässa sind. Churz vorm Iidunkla hämr de hufa Loriniis chöna zualuaga wia sie ufa da Palma ihres Schlogplätzli suachen. Dia süassa Vögeli sind mindestens immer z zweita nebanad hergöklet und händ kuschelet und händ no eis Gezwitscher ka. Es isch de no as Wili ganga bis alli Vögali ruhig gsi sind. Au das Ganza isch wiedr mol a mega schöna Moment gsi zum eifach dia Tiarli beobachta!😍