_e anderi Hafestadt_

Mokpo isch ganz im Süüde vo Korea. Vill umliegendi Insle sind vo do uus mit de Fähre erreichbar. Bekannt isch d Stadt für Meeresfrüchte und Schiffsbau. Lang isches e wichtigi Stadt gsii, vor allem wo Korea vo Japan bsetzt gsii isch.

D Stadt isch definitiv grösser als erwartet. Sie het e Gondelbahn wo über di ganz Stadt uus führt, de Usblick über di ville umliegende Insle gfallt mer sehr. Zmitzt i de Stadt hets en Berg/Hügel zum bewandere. Im Siwha Dörfli sind offebar einigi Szene vo bekannte K-Dramas gfilmt worde.

Mir schiints uf jedefall sehr friedlich, d Lüüt sind interessiert und guet gluunt. I ha freud gha!