_e gueti mischig_

Bsunders Freud hani i de Regel, wenns ame Ort chli vielsiitigi Sache zgseh git. Chli Gschicht, Kunst, Natur oder eifach Stadtteil attraktiv zum chli umeschlendere, käfele oder shoppe isch immer guet.

Gwangju het definitiv überraschend Vieles zbüüte. Alles isch guet erreichbar, het schöni Stadtteil und isch glich nöd so überlaufe wie Seoul. Die Pinguinestross isch aso echt guet gmacht gsii, e Mischig us herzige Zeichnige und Objekt im Retro-Stil. Für da dassi eifach dohii ha wöle cho, will s Buech Menschewerk vo de koreanische Autorin, de Han Kang glese ha, hets mi echt überrascht. Wenn mer meh Ziit het wie mir etz, chönnt mer locker no im Nationalpark go wandere oder e Performance im Arts Center go luege.

De Usflug het sich definitiv glohnt!