_Skiferi in Japan🇯🇵_

Station Nr. 1 isch s Niseko Dörfli gsii.🏠 Uf de Suechi noch Skijacke, Skihose & Händsche simmer dur die Strössli gschlenderet bis i mi denn schlussendlich für schlichti schwarzi Skihose und e schöni hellvioletti Jacke entschiede ha.🧤🏂 Es söll nöd all zu sportlich usgseh und glich fürs Snööbe tauge. I bi so happy mit mim Iichauf!🛍️😊

S Wetter wechslet dur de Tag immer chli, sodass immer irgendwenn en perfekt sunnige Ziitpunkt verwütschisch.🌤️☀️ Zwüscheddure schneits amel chli, was d Piste immer wieder mitere Schnicht Neuschnee bedeckt.🌨️ De Schnee fühlt sich unfassbar weich aa. S Board gleitet so wunderbar uf de Piste!❄️ Es macht so Spass zwüsched de Bäumli dure z kurve und sich so en Wäg wieder zrugg uf d Piste z’sueche.

Es git Gondle und Sessellift, Bügellift gsehni kei.🚡 Wani bis etz no nie gseh ha, sind aber Einer-Sessellift. De gits do ohni Sicherheitsbügel und ohni Abstellflächi für s Board. So sitzi uf em Sessel, wo chum e Lähni het & heb mi fest am Bügel wo de Sitz mit em Seil verbindet. A jedem Lift stoht öpper wo dir de Sitz putzt und dir denn hilft herezsitze, au bi de Gondle wird eim s Board vom Personal iiglade. Super Sach, aber au bizzli unnötig.🎖️

D Lüüt uf de Piste fahred relativ gmässigt, de klassische Raser wos bi üüs jo so git bini no nöd begegnet. A de Pisteränder sind immer wieder chli Lüüt am päusele, bis si di nöchst Strecki bewältiget und d Ski- und Snowboardschuel-Gruppe sind vor allem a de undere Lift au omnipräsent. D Skilehrpersone sind do grüe, statt rot. (Denn hetti jo glich chöne roti Skichleider chaufe…)

Mini Lieblingspiste sind uf de Annapuri-Siite, di wiite Piste ladet ii chli Trickli usprobiere und au eifach dur de Neuschnee z gleite. Kei Wunder hets do immer ganz vill Lüüt a de Lift!

D Mensche vo mer do so uf de Piste aatröfft, sind grösteteils Australier, Chinese und Japaner. Isch no e aagnehmi Mischig findi! 🇦🇺🇨🇳🇯🇵

Leider het d Nahara gad e Mittelohrentzündig iigfange. Drum bini hauptsächlich chli elei uf de Piste, was einersiits Spass macht, will mer jo immer dötane cha go wo mer will & nie uf öpper mue warte und gliich hani hald au eifach gern öpper, wo mi üslacht, wenns mi umnimmt oder zum Schwätze uf em Skilift. Hoffentli wird si aber bald gsund!🤧