_En Abstecher id Wüesti Gobi_

Dunhuang isch e Stadt i de Wüesti. Vor allem währed de Han Dynastie isch d Handelsroute do bsunders belebt gsii. De Fluss und d Oase wo dur d Stadt gflosse sind, hend de Ort zume beliebte Stopp für Handelndi und Reisendi us aller Welt gmacht.

Belebt isch de Ort uf kei Art und Wiis meh richtig, ämel nöd zu dere Saison gad. Es isch di chlinscht Stadt uf üsere Chinareis, vill Gschäft sind gschlosse, Strosse und Sehenswürdigkeite werdet gad restauriert. Wenn mer so dur d Strosse lauft, falled di viele leerstehende Gebäude uuf. Underem Tag isch nöd vill los, vill Läde und Restis sind zue, wenig Lüüt sind underwägs. Uf de Stross, i de Pärk und am Flussufer begägnet mer aber doch immer wieder Iiheimische. D Lüüt do sind uffallend fründlich, ufgschlossener und wirked wesentlich ruhiger als i andere Städt. Di meiste hend würkli richtig Freud gha, wenns üüs hend chöne helfe, si drängelet nöd vor und selbst a Touristeort bedrängeds eim nöd. De Charme vo dere Stadt chunnt aber definitiv vor allem noch Sunneundergang zum Vorschii. Denn lüüchted nämmli alli Lämpli, d Läde und d Restaurants hend offe und en huufe Lüüt sind uf de Stross.

De Ort het ganz vill Hotels. Touriste reised dohii und verbringed de Tag a de berüchtigte Oase oder bsueched d Mogao Grotte, vill meh gits do aber suss au nöd zgseh.
E Sandwüesti isch etz au nöd s erst wo eim in Sinn chunnt wenn mer a China denkt. Umso reizvoller de Ort z bsueche. D Sanddüne do gebed e wunderschöös Bild ab. Mir laufed di steil Düne ufe, de Sand zwüsched de Zeche fühlt sich eifach herrlich aa. Windstöss mached s ganz Erläbnis mengmol chli unagnehm, aber das haltet üüs nöd devo ab de Moment eifach z gnüsse! D Oase isch chlii und chli uströchnet, aber für e ultimativi Sandwüesteerfahrig isch si super! D Kamel sind au so härzig, chlii und richtig wuschelig!

I versuech mer vorzstelle, wie vor villne Johr all die Reisende ihri Wäg dur die Wüesti bstritte hend. S Klima isch etz gad sehr aagnehm und gliich führt de Wäg eifach dur eewigi Sandlandschaft.

De Bsuech i de Mogao Grotte vervollständigt mini Ziitreis so richtig! I de Sandstei hend sich über so vill Dynasie hinweg Künstler vo aller Welt as Werk gmacht, Gschichte a de Felswänd festzhalte. I dene über 2000 Grotte sind einzigartigi buddhistischi Meditationsrüüm gstaltet worde, au Herrscher hend ihri Legende i Form vo ufwändige Kunstwerk do abbilde loh. Ei Herrscherin het e riesigi Statue baut, wo di umliegende Lüüt uf ihri Macht ufmerksam gmacht hend. Bsunders iidrücklich sind d Grotte, a dene mer erkennt, dass Lüüt vo aller Welt am Werk gsii sind, anderi Kulture, anderi Stil, Symbol und Muster. A gwüsse Kunstwerk sind sowohl taoistischi, chinesisch buddhistischi als au indisch buddhistischi Szene abbildet. Dur de international Usstusch a dem Ort, sind au wertvolli Farbpigment vom Weste verwendet worde. Gwüssi Molereie erinneret au ägyptischi Molereie. Üse Guide forscht a de Ort scho sit villne Johr, vo dene 2000 Grotte sind nur 40 für Touriste zuegänglich, ganz vill werdet erst no erforscht und usgrabe. Mues en extrem spannende Ort sii, do z forsche, Kunstwerk usgrabe, restauriere und interpretiere! I bi uf all Fäll sehr beiidruckt!