_Abschlüssendi Wort zu China_

I ha mit de Kerstin e sehr e cooli Reisekumpanin gha mueni sege. I wür sege mir sind beidi sehr neugierig & gönd mit offnem Herz uf e neus Land, fremdi Völker zue. Mir sind beidi überrascht worde vo de iidrückliche Landschafte und hend üs amüsiert ab de turnende und tanzende Chinese und Chinesinne i de Pärk.

Si het definitiv chli meh s Bedürfnis gha underwägs zsii, si het vo morge früeh bis zobig spot chöne umenandlaufe, i ha lieber amel no chli chillt dezwüsched. Si het chli akribischer plant, i het gaub amel chli schneller Nägel mit Chöpf gmacht. Mir hend glernt, usefinde wieso, dass mer mengmol chli gnervt sind, Bedürfnis guet kommuniziere und eifach au suss meh über enand, wa mer gern essed & was üüs so interessiert, denki. Beidi sind chli fotischüch, glich findi es het paar sehr tolli Föteli geh!

S Esse het mi ehrlichgseit nöd so us de Socke ghaue, vlt. hemmer au chli di fasche Sache probiert. Vieles isch Fleisch und/oder sehr fettig. Min persönliche Favorit sind aber eidüütig di dämpfte Dattelbrötli us Xi‘an.

Üsi Reiseroute hani so abwechsligsriich gfunde! Es isch guet, wenn mer chli weiss, wa dass mer wo will mache und d Täg chli dementsprechend iiplant, will s entdeckende Umenandlaufe mengmol chli langwiilig oder schwierig isch. Bsunders in Peking isches wichtig, dass mer Tickets oder Toure früehziitig (mind. 1 Woche vorher) buecht. A de meiste Ort chunnt mer aber au guet ohni vorusbueche ane. Überall hets i de Regel Shuttlebus, Seilbahne, Böötli, alles mögliche.
D Touristeort sind immer mit tuusig Lüüt gfüllt, vo morge bis obig, dass mir immer froh gsii sind, wenn mer ab und zue wieder chli en Egge für üüs gha hend. Gad chinesischi Gruppe sind vill, luut und laufed mitme Tunnelblick dur d Weltgschicht. Paar chinesischi Guides hend üüs etz gseit, dass di chinesische Gruppe eigentlich di müehsamste sind, wani no witzig find (vor allem d Rentner störed si glaub amel chli).

Erholsam isch definitiv nöd s Wort die Reis am beste beschriibt. Sisch ufregend, spannend und mengmol au chli verruckt. Me mues sini Wäg immer wieder chli finde und wird vo unvorgsehne Sache überrascht. De Pass und diis Gsicht isch de Iitritt für fast alles, wenn eis vo beidem nümme existiert, isch mer zimmli ufgschmisse. A eim Flughafe het en Bildschirm dir über Gsichtserkennig din Flug aazeigt und au gad de Wäg zum Gate ufzeichnet, so guet kenned sie etz mis Gsicht.😎

I find China isch definitiv e Reis wert, es git so viel z entdecke. Was mir i dere churze Ziit gseh hend, isch natürli nur en winzige Bruchteil vome riesige Land!