Close map
/ Südamerika Trip

Iguazú – Iguazú

Argentina, 27. July 2018
Foz do Iguaçu cha mer uf de brasilienische und de argentinische Siite go aluege. Mir sind uf Argentinie gange zum en Teil vo 275 Wasserfäll go aluege.

Ufem Weg det ane isch eus de mega dichti Dschungel ufgfalle. Ohni Machete chunnsch chuum ine. Ein Schritt dinne und mer hett dOrientierig verlore. I dem Dschungel verstecked sich Tapir, Puma, Deer, Jaguar, grossi Ratte, Schmetterlingarte, Vogelspezie. Scho bim Igang hemmer die super herzige Micos (au Monos gnennt) und Coaties gseh. Ich ha ned chönne ufhöre dene nahzlauffe. Die sind so zuckersüess!

De Dschungel beherbergt 2‘000 verschiednigi Baumarte. Ade Bambus hani am meischte Freud, wel die ja 5 Jahr eifach i de Erde bliibed und denn plötzlich 10 cm jede Tag wachsed. Das verzelli im Name vo Federleicht Coaching immer. Wür mer Bambus im Garte apflanze, dürfti mer 5 Jahr ned ufhöre Wasser geh und dra glaube, dass de Bambus no chunnt, au wenn mer no nüüt gseht. Hört mer mal uf güsse, stirbt de Bambus. Pflegt mer de Bambus aber die ganze 5 Jahr dure, spriesst er plötzlich usem Bode und wachst jede Tag 10 cm. Wenn hemmer s‘letschte Mal amene Traum gschaffed und so lang dureghebt ohni irgendwelchi Erfolg zgseh?

Zrugg zu de Wasserfäll. D‘Temperatur dete variert extrem. Wo mir dete gsi sind isch um die 16 Grad gsi. Letscht Wuche ersch grad isch 30 Grad warm gsi. Sie cha ide Winterziit (Juli) au bis uf 5 Grad abe gah.

Als erschts simmer grad zum Devil‘s Throat, wo nur scho 14 Wasserfäll zgseh sind. Es falles 1.5 Mio Liter Wasser i de Sekunde! Das isch fasch ned vorstellbar.

Im 2005 und 2015 hetts am Afang vo de Flüss so viel grägned, dass dFlüss um 30 Meter gstiige sind und s3-fache a Wasser dene Flüss abecho sind. S‘Wasser hett sone enormi Chraft agno, dass die Bruggene wo mir gno hend zum an Devil‘s Throat lauffe, komplett weggspüelt worde sind. Euse Guide, de William, hett verzellt, dass er vorem 2005 jede Tag Krokodile gseh hett, wenn er bi de Flüss gsi isch. Sit dem erschte Hochwasser hetts kein einzige Krokodil meh. Die müend wohl alli weggspüelt worde sii.

D‘Arlette und ich hend eus amüsiert, ab de viele Mänsche, wo e extra Täsche für ihre Mate-Tee hend. Teilwiis sinds mega fancy und mer gseht immer dLüüt Pause mache und Mate ztrinke. Anschiinend trinked die 8kg Mate pro Tag!
Süesse und neugierige Coatie
Heisses Wasser fürd Mate-Trinker. Tee-Trinker dörfed aber au neh :)
Mami und Bäum - e Liebesgschicht
Ufem Weg zum Devils Throat
Völlig nass vode Wasserfäll :)
Die Bäum sind so interessant. Jede Baum isch ganz einzigartig
Ich liebe Bambusbäum :)
Die Wasserfäll werded Schwöschtere-Wasserfäll gnännt. Gemäss Mapi en klare Fall: Ich bi links und d‘Arlette isch de Wasserfall rächts
So nöch sind die herzige Coaties cho :)
Die letschte Sunnestrahle am ifange
Fancy Täsche zum Mate trinke
Im Niemansland zwüsche Brasilie und Argentinie
A die Ussicht chönnt mer sich gwöhne

Iguazú – Iguazú

That could interest you too

*