D'Bötlifahrt zrugg noch Bali isch wiedr sehr wild gsi. Noch drei Stund ufm Meer simr froh, müamr ni no witerreise und chönd direkt is Hotel, wo noch näbem Hafa isch.
Zum Glück hämmr nomol a freia Tag ihgrächnet, zum nomol chli erhola. De hämr brucht! Dr Marc isch leider wieder ni so fit gsi und het gschlofa, während dem i gläsa ha. Liggt das würkli eifach ar Insla?

Energievoll, mit voller Vorfreund und abr auch mit biz Respekt hämr am nöchschta Tag dr Open Water Diver Kurs gstartet. Noch spannendr Theorie am Morga simr am Nomi de scho zerst mol mit Vollmontur inda Pool. Wer heti das denkt, dass dr Marc vo Afang ah viel weniger Müah ka het als i... eigentlich bin i suss d Wasserratta.
Am zweita Tag heissts de scho ins Meer go Taucha. Mimna Bötli simmr zum erst Tauchspot gfahra und händ dia glicha Üabiga vom Pool nomol gmacht, bevor mr de bis uf 12m aba taucht sind. Danoch isch a Pausa agseit, damit dr Körper dr Stickstoff "abbaua" cha, bevormr den zweita mol in See gstocha sind zum go Taucha. Soo viel Glernts ahwenda und so viel Idrück erläba macht müad, darum simr de nochm Kurs zmittst am Nomi biz go schlofa. Doch ni lang nochert simmr scho wiedr ins Wasser, nämlich in de schön warm Pool.
Dr dritti Tag isch en richtiga Gnuss gsi. Wieder sind zwei Tauchgäng agseit gsi, diesmol no biz tüfer, nämlich bis uf 18m aba. Jetzt woma sich so sichr under Wasser fühlt, chama z Taucha so richtig gnüssa. Soo viel schöni verschiedeni Fisch und Korallana hämr gseh, dia Welt muama mol erlebt ha!😍 Sogar as Schiffswrack hämmr chöna go aluaga (obwohl, wia vermuatet, händs das Schiff ägstra versenkt😂 idrücklich isches trotzdem gsi😊).
Nachda Tauchgäng isch nono a Theorieprüfig ahgseit gsi und scho isch de Tauchkurs verbi gsi und mr händ ez offiziel dr OWD.
Ez erst rächt gwöhnt ans Wasser, simr wiedr für as ganzes Willi in Pool und händ dr Nomi gnossa und dia viela Idrück revue passiara loh.
Am nöchschta Tag heisst wiedr biz ruhiger agoh. Zuda zwei schön Stränd laufa, chli sii, drohna starta und dr Pool gnüss.