( Overview
/ Costa Rica 🇨🇷
In San Jose isch es wiiterhin sehr kalt und es regnet jede Nomitag. Ide Büs git‘s kei Meldig, wenn die nöchst Haltestell chunnt oder so. Das heisst, be dere Ussicht döff mer sini Haltestell nit verpasse
Vo dere Wuche git‘s sehr vill z‘brichte, also fange mer ah:
Am Mittwoch hani 2,5kg mehl brucht für de Zopfteig für‘s Gschäft. Am Fritig isch da nämlich de Tag vo de Kulture und ich döff d‘Schwiiz vorstelle.
Es sind zwar nit die schönste worde aber sie sind tatsächlich recht guet gsi und d‘Kind hend mega Freud gha und hend‘s fein gfunde
Mer hend denn dihei e vermischig vo de Kulture gmacht. Callo pinto (de Riis mit Bohne, typish Costa Rica) und dezue schwiizer Zopf. Sehr en spezielle z‘morge
Zum zopf hani denn no e Röschti gmacht und so het‘s denn am Schluss usgseh
Und das isch de ganzi Stand gsi
Am Samstig bini mit zwei Kolleginne us de Usa uf Puntarenas. Im Hotelzimmer het‘s aber ÜBERALL Schimmel gha, also würklich sogar uf de Fernbedienig. Und es het sooo grusig gstunke i dem Zimmer
Aber ja mit em reise lernt mer bescheide z‘sii würi mal sege😅 warm Wasser ide Duschi wird zum Luxus
Mer hend eus uf de Schock denn zerst mal so en Drink gholt wo aber leider besser usgseht weder schmöckt…
Denn simmer an Strand und für es schöns Foti het‘s glengt aber au de Strand het fürchterlich gstunke und isch mega zuegmüllt gsi
Jetzt aber fertig gmotzt: nach ere unterhaltsame Uberfahrt mit eme sehr spazielle Fahrer wo chli zu vill Droge nimmt simmer uf e Bootstour. Det hemmer mit eme Tequila sunrise gstartet und sind denn los uf e einsami Insle
Zerst simmer em Hafe entlang
Und nachdem mer Wasserschildchrotte und Pelikane gseh hend simmer uf dere Insle acho. De Tourguide het eus det abglade und ufem Boot für eus kocht. I de zwüscheziit sind mir völlig elei mit ere Channe Kaffi uf dere Insle gsi und hend‘s eifach cjönne gnüsse
Wärend dem wunderschöne Sunneuntergang isch es ganz still gsi, mer hent nur ide Ferni ab und zue e paar Brüllaffe ghört und d‘Welle.
Denn simmer zrugg uf‘s Boot und hend gesse. Nachem Esse simmer is Wasser und hend wider d‘Biolumineszenz gseh. Das mal het‘s gregnet und vom Boot het mer überall gseh s‘Wasser uflüchte wenn e regetropfe im Meer glandet ish. Es isch würklich hammer gsi
Am Sunntig simmer denn an Strand und natürlich gaht da be mir nit ohni Sunnebrand. Aschlüssend simmer mitem Bus zrugg uf San Jose und det startet die neu Wuche
Sign in with Apple 
Log in with Facebook