Hüt startemer nid all zu früa mitemna wunderbara Zmorgabuffet in Tag. Miar spazieren dur dia idrücklich Stadt mit sehenswärta Gebäude zum Circular Quay. Döt stigemer uf z Schiff, wo üs als ersts uf Watsons Bay bringt. Ufm Seewäg chümr nomol d Harbour Bridge und z Opera House bestuna. Z Watsons Bay machemer a chlina Spaziergang dura Sydney Harbour National Park und bestunen d Klippa bim Gap Bluff. Uf dr Wiesa grad nebetem Schiffssteg gsiamr a hufa Gelbhubakakadus und uf da Bäum a paar Regabogaloris. Um da Mittag uma gohts din mitm Schiff witr zum Manly Beach. Döt achu spazieremer zum Strand und schnappen üs öpis zEssa. Plötzli entdeckemer im Meer a hufa Delfin, wo spielend verbei schwimmen. So a schüna Ablick! Dernoh laufemer nomol dur d "Lädaligass" und schnappen üs no as Glace, bevors mitm Schiff widr zrugg uf Sydney an Circular Quay goht. Nochm Znacht entspannemer üs din no im Spa wo gad im Hotel isch.