Hüt hämr ni viel plant, miar fahrend zwei Stund richtig Süda, richtig Kangaroo Valley. Ufdr Fahrt döt hi chömend scho fascht biz Heimatgfühl uf, d Umgäbig isch sehr ähnlich wia ir Schwiz, und es het au schmali, hügeligi und kurvigi Strossa.

Dr ersti Stopp hüt machmr bida Fitzroy Falls, womr de chli vo Ussichtspunkt zu Ussichtspunkt laufend und Kakadus beobachten.

Drnoch heissts scho richtig Unterkunft fahra, denn hüt hämr a Bsundrigi gfunda. Es isch a "Tiny house" zmittst ir Natur und da wämr au gnüssa chöna. Und es isch a pura Gnuss, denn ufdr Weid nebedt dra Weiden so viel Kängurus, dassmr üs zerst ni sicher gsi sind, obs a Farm isch oder ni. Doch wo de ufdr andera Sita zwei Lüt verbigloffa sind, sind de alli Kängurus underem Zuh dura in Wald ghüpft, was de z Rätsel glüftet het. Bimna Kaffee luagemer de no ada Rosa- und Gelbhubakakadus und andera Vögel bim Knäbberla ufm Boda zua, bevormr de nomol ufbrächend. Miar händ dr ganz Weg is Kangaroo Valley eigentlich us einem Grund gmacht, nämlich zum Ändlich mol Wombats gseh. Zletscht Mol in Australia hemr a hufa gseh, doch leider immer nu tot am Strossarand liegend. Darum stiegemr nomol für 6min is Auto und fahrend zur "Bendeela Recreation Area". Ez wos hell isch hets nu fangs ein Wombat. Wos de avo idunkla tuat chömend meh und meh usda Löcher füra und au a hufa Kängurus und a Kusus gsehmr.
Zrugg bi üsem Tiny House isch afanga so dunkl, dassmr d Taschalampa bruchend, zum vom Parkplatz zum Hüsli laufa und gad vor üsem Hüsli sind ez au Känguru am Fressa. Wias noni gnuag schön gsi isch, gsehmr spöter im Bett liegend auno zwei Wombats vorm Hüsli grassa. Was für en wunderschöna Obet und wunderschöns Plätzli das isch!😍