Am liabschta würdemr no länger a dem Örtli blieba, doch leider müamr bis am 10 uschecka. Doch nochmna eifacha zMorga gömmr nomol go Kängurus aluaga und gnüssend dNatur. Wellmr hüt wiedr biz a Grundmüadi händ entscheidmr üs dazua, ni viel zmacha. Mr fahrend as Stündli zu üsm nöchschta Hotel in Huskisson am Jervis Bay, laufend döt biz dur zDörfli, organisiarend dr Tauchgang für mora, gönd biz an Strand und füahrend ändlich wiedr mol dr Blog nocha.

Hüt hämr au wiedr mol a spezielli Situation erläbt. Miar sind Unterwegs schnell inas "australischs Bauhus", zum Schrübali füra Feldstächer hola. I dem grossa Gschäft hets scho a hufa Wiahnachtssacha usgstellt ka, über dia miar gad am irgendwelcha Seich am reda gsi sind. Plötzli merkemr, dass alli Lüt im Gschäft sich nüma bewegend und reden, darum hebend au miar üsi Müler und bliebend stoh. Miar hend gad kei Plan ka, was dia ganz Situation söll... Nochera Minuta goht de alles normal witer, als ob nia was gsi seg. Ar Kasse hemmr us Wunder de glich müassa froga, was das het sölla. Dr netti Maa hinter üs erklärt üs de, dass am 11.11 am 11i immer a Schweigeminuta dena Soldata gwidmet wird, wo im Kampf uma Schutz vor Nation im 1. Weltchrieg gstorba sind.