Mit voller Vorfreud machemr üs hüt ufa Wäg für üsi nöchsta zwei Tauchgäng. Bir Tauchbasis schnappemer üs üsi Usrüschtig und lernen üsi Tauchinstruktorin und eini vu Alaska,wo au mit üs mitchunt, kenna. Dernoh heissts zrugg ins Auto und zum ersta Tauchspot (Seaman's Beach) fahra. Das findemer all 3 a biz speziell, will mers no nia so erläbt hin. Nochemna Wili warta trifft din d Instruktorin au i und miar machen üs parat für üsera ersta shore-dive Tauchgang. Z Wetter isch hüt nid aso rosig und d Sunna mag nid dur d Wolkadecki duridrucka, entsprechend isch au d Sicht unter Wasser nid aso guat. Z gseh giz leider au nid a so viel, a paar Fisch, hüfa Seeigel und no meh Seegras und Sand. Für üs, wo mit da Spots mit farbiga Korallariff bis jetz verwöhnt gsi sin, fascht a biz entüschend. Nochdem miar din dr Lufttank gwechslet und öpis trunka hin, stigemer bim nöchsta Spot (Murrays Beach) ins Wasser. D Sicht isch döt a bizli besser und miar gsian nebst a paar Fisch au no zwei Haia. Mit übr 100 bar tauchemer am Schluss uf und verlöhn z Wasser. Irgendwia no speziell, will ma normalerwis eigendli no biz länger blibt, abr janu as hät io au nid a so vil z gsia gi. Spötr gümr din no ufna Spaziergang und essen a feins Fish & Chips am Strand.