Ufstoh und zum Glück mit liachterem Gepäck zum Flughafa laufa und richtig Alice Springs flüga. Es goht wiedr zrugg ins Northern Territory, das heisst wiedr 90 min Zietverschiabig. Diesmol in dia für üs positiv richtig.😊
Döt acho heisst zerst mol bi beidna Rucksäck luaga was usglaufa isch, denn sie sind beidi zum teils füacht. 😂 Das sowas passiart isch fascht logisch gsi, wemma gseht wia dia am Flughafa mim Gepäck umgönd. Doch aswia ischs au verständlich, denn tagelang go Gepäck umabiga isch sichr mi gad ztollschta.
Als zweits müamr luaga wiamer id Stadt chömend und frogen de Ma vormna Car. Er macht dr Shuttel id Stadt und womr de sägend wohära miat müand, stellt sich usa, dass er au üsa Autovermiater isch. ZDoofa isch nu, dass er recht verwirrt gsi isch, denn er het hüt eigentlich niamert meh erwartet.😂 Doch er isch sehr engagiart gsi und het sofort ind Vermiatzentrala in Darwin aglütet. Dr Weg vom Flughafa bis zur sinr Vermiatstell isch de chli as Banga gsi für üs, denn miar hend ni gwüsst was üs erwartet. Het er jetzt gar kei Auto mit Dachzelt döt odr müand miar üsa groba Plan ändera? Bechömr eifach as anders Modell, als miar buacht hend?
Womr de gseh hend, dass üses Modell döt stoht, simr de scho biz froh gsi, denn miar hend üs mega gfreut druf, dia Art vo Camping chöna usprobiara. A dem Ma hämrs abr gar ni übel gnu, denn er het gar nüt dafür chöna und er isch so herzig bemüaht und engagiart gsi!

Nochdem mr alla Papirchram gmacht händ, hämr üses Zügg iglada, sind id Stadt gfahra zum öpis go essa und de go poschta. Drnoch simr de direkt ufa Camping und händ üsi Reiserouta gnauer plant.