Hüt fahremer früah los, miar hin nämli no einhalb Stund Wäg vor üs und müan am halbi 8i bir Tauchbasis parat si. Uf Wäg gönnemer üs a feina Kaffi und derzua a Pie, das isch typisch Australisch und chaiba guat. Nochem Briefing ir Tauchbasis z Alva Beach, startemer vumena wunderschüna Strand us mitm Böötli. Will miar no a churzes Deep Dive Training müan macha, startemer zimma mitemna andera Päärli üsa Tauchgang als letschts. Dia Eint, vur zweita Gruppa, spüalts grad nochm Drigumpa zimmli zügig dervo, so dass si d Leina vum Anker nüma verwütscht. Dr Kapitän hät din z Boot nomol müasa lösa und si go ufpicka. Noher sin din miar dra gsi und d Strömig isch schuno gröbr gsi, für üs abr machbar. Dia ersta 6m in d Tüfi himr üs din dr Leina no richtig Wrack zoga, dernoh het d Stömig noh loh und es isch komfortabel gsi wia immr mit Taucha. Das doch schu über 100 Johr alta Dampfschiffwrack isch mit Koralla überwachsa und beheimatet (vermuatli nebst a paar Lichena) au a Hufa verschideni Fisch, Seeschlanga, Adlerrocha und Qualla. Haia himr leidr widr a kai gsia abr beidi Tauchgäng sin absolut genial gsi. Zrugg im Truchna sait dr Kapitän, er heg a chlises Problem mir Moschtzuafuahr. Dr Bootsjunge het din müasa vu Hand pumpa. Bevor miar abr los gfahra sin, himr gwartet bis sich d Hilf uf Wäg gmacht hät, will dr Kapitän nid gwüsst het, wia guats klappa würd. In dera Zit verzelltr üs, warum anno duazis d S.S. Yongala versunka isch, a sehr spannendi Gschicht. Üsers Boot isch din jedafalls widr tiptop gfahra und ir Häflti chunt üs d Hilf mitera Chüalbox Biar entgäga, wunderprächtig. Miar fahren nochemna BBQ ir Tauchbasis uf Ayr womer no Wösch machen und in Pool gumpen.