De Morga startemr wiedr mol chli gmüatlicher. Nochm zMorga heissts no Wösch zemalega und alles parat macha. Während dem isch eina vom Camping am Mangos voda Bäum am schnida, wo überall ufm Campingplatz verteilt sind. Do mr das nonia gseh hend, hämr de fascht scho biz gstundt wia guat de das mit dera langa "Schär" macht. So simmr de chli ins Gspröch cho und hend no so a Mango döfa mitneh. Doch es goht no paar Täg bis sie rief isch. De heissts istiega, abfahra, go poschta und ab zum nächschta Ort. Z Bowen gömr ufena Lookout, womr de au zMittag essend. Drnoch gömr no dia bekannt Riesamango go aluaga und fahren bis zum Airlie Beach, as sehr touristischs Örtli. Mr laufend chli dur dLädeli und de fangts de plötzli avo regna wias nu cha. Gezwugenermassa gömr de halt as Glace go essa. 😜
So schnell wia es cho isch, ischs de au wiedr ganga und miar machend üs uf richtig Coral Beach. Ufm Weg döt hi machmr no a churza Stopp bimna Lookout, bevor mr zum Coral Beach laufend. A Strand us nu abgstorbna Korallana, schono idrücklich.
Gega Obet gömr de ufa Campingplatz. Es isch a Campingplatz, wia mrs nonia gseh hend, Camper an Camper, so dass ma ni mol a Stuahl näbet dra stella cha. Janu, de issemr halt üsa zNacht bim ungmüatlicha Plätzli hinderem Camper.