Hüt werdemr am 6:15 bi üserem Campingplatz abgholt für üsi Tagestour. Miar startem a biz vorm 7i dr Rundflug über d Whitsunday Islands und a Teil vum Great Barrier Reef. Ufm stündiga Flug stunemer ab dera idrücklicha Insellandschaft und em Riff. Vu Oba gsiat das ganza nämli au no ganz lässig us. Zrugg ufm feschta Boda giz a Egg Benedict im Gipfali und a Kaffi. Spötr stigemer uf z "sehr guat gfüllta" Böötli in Richtig Tongue Bay, a Bucht bir Whitsunday Island. Miar stigen us und spazieren ufa Hill Inlet Lookout, womer ufa Whitehaven Beach gsian. Dr Wäg dura dichta Wald isch sehr schü, abr dia chlina Mucka odr was au immr das gsi sin, hetten nid müasa si. Witer gohts din zu dem Whitehaven Beach und de Sand döt isch tatsach chaiba wiss. Im Chneutüfa Wasser gsiamr a hufa Stachelrocha. Zrugg ufm Boot giz as Salötli und miar fahren mit dena hufa Tourischta witr zur Mantaray Bay, womer go Schnorchla gün. As het hüfa, sehr farbigi Koralla und au viel Papagaiafisch - ma sait demfall a gsunds Riff. Noch nid all zu langer Zit gohts witr zur Butterfly Bay, womer nomol in de Salztümpel hüpfa dörfen. D Sicht isch do leider nüma so guat wia bim ersta Platz und miar gsian weniger Fisch. Zrugg z Airlie Beach ischs üs din au glich, widramol a biz us da Lüt z si. Zum Znacht gnüssemer a feini Pizza uswärts, dr eng gstuahlet Camping isch nid aso gmüatli zum Hökla.