Au hüt stümr widr bi Zita uf, miar hin nämli vor zum 713km uf 1770 zruggzlegga. Das isch dr einzig Ort uf dr Wält, wo dr Ortsnama nu us Zahla bestoht. Das chlina Örtli treit dr Nama 1770, will dr James Cook anno 1770 döt hi gseglet isch.
Ufm Wäg döt hi fahremer viel dur Wald abr au hüfig an Zuckerrohrplantagena verbei. Teilwis sinds do grad mir Ernti beschäftigt und verladen d Zuckerrohr uf Zugwägali. Ir nöchi vu Gladestone chrüzemer a ewig langa Güaterzug mit 4 Lokena, wo vermuatli Chola glada het. Z Gladstone hets nämmli a Cholachraftwerch und au a Hafa, vu dem us d Chola exportiert würd. Viel Stopps machemer nid, einzig hi und do zum Tanka. Womer din z 1770 ufm Campingplatz achün, vermisst öpr dr eintweder Flip Flop. Pflichtbewusst het sie dia Schlarpa natürli abzoga mit Fahra. Wo ächt de hanga bliba isch? 🤔 Noch churzer Suachaktion isch klar, de muas ar letschta Tankstell z Miriam Vale verlora ganga si. Miar gnüssen din trotzdem no dr Obet und spazieren no am Strand bis zum Denkmol vum James Cook (dia einta ez halt barfuass😉).