Am 6i am Morga lütet bi üs scho wiedr dr Wecker. Noch 7 Minuta Autofahrt chömr am Hafa 1770 ah und nähmend zerst mol a feina Kaffee mitemna leider nit feina Gipfali.😂 Am 7i stiegemr de ufs Boot voda "Dive, Spear and Sport 1770" zum as witrs Mol go taucha. Chum simr ufm Boot, fangts avo tröpfla, doch mittlerwilla wüssemr, dass das nüt heissa muass, denn zWetter cha schnell wechsla. Noch 1 1/2 Stund Bootsfahrt bi rauer See chömr de bim Llewellyn Reef ah. De heissts alles Züg alega, no as churzes Briefing und de ab zViarta go Drifttaucha bimna Ort, wo dia Tauchfirma au nonia gsi isch, doch es isch de ruhigst Platz zu dem Zietpunkt. Es isch a mega coola Tauchgang gsi und mr händ ändlich üsa ersti Riffhai gseh und au Fischli, womr davor noni händ gseh! Au Tauchleiterin findet de Spot so supr, dass sie üs noch passenda Näma frogt, damit sie wiedr Mol döt hera go chönd! Miar hend dr Tauchspot Rolling Valley tauft.
Zeinzig doofa isch Tauchusrüstig gsi, denn Tarierwesta isch ni dia bescht gsi. Bleichlötzli hämer ni wia normal amna Gurt aka, sondern id Tarierwesta dua, was sowiet eigentlich kei Problem isch, doch leider sind dia Täscha ni guat, sodass i a Bleichlotz verlora ha. Da het de usglöst, dassi immr biz Müah ka ha zum duna blieba,doch zum Glück hani a guata Tauchbuddy, wo uf mi luagt und amigs schnell zur Stell isch und miar hilft.

Noch paar Snacks, öpis warms zum Trinka und a churzi Bootsfahrt gömr wiedr ins Wasser. Diesmol tauchemr bim Mushroom Valley. Wegda Strömig hemr de zRiff biz verfählt, doch es isch trotzdem cool gsi. Mr hend nomol zwei Haia gseh und a Schildchrot.
Dr Ugstieg isch recht amüsant gsi, denn i bi sowieso dia ganz Ziet scho fascht chopfüber taucht und wo de dLuft weniger worda isch im Tank, bini chopfüber fascht ab wia a Boja. Tauchleiterin und dr Marc händ mi de probiart chli abazüah, so hämr de dr Sicherheitsstopp meh odr weniger chöna macha. Ar Oberflächi hämr de zerst mol alli müassa lacha.😂
Zrugg ufm Boot bechömr no a Nüdalisalat und sie verzellt no vomna Riffschutz- und Unersuachigs-Programm, bi dena sie mitmachend. Da isch a spannendi und lehrrichi Sach gsi. Zum Bispiel verzellt sie, dass dia Dornenkronenseestärna, zwar schön sind abr chli überhand nähmend. Z Problem isch, dass dia a grossa Appetit uf d Steikoralla hen. Drum duat dia Tauchfirma dia kontrolliara, idem sie mitera uu langa Sprütza normals Essig verabreichend und dia Seestärna so stärbend. Zudem verzellt sie vonera eher jüngara Studia, dia davo usgoht, dass dia wit verbreiteta Papageiafisch öpa 1/3 vo allem Sand ufda Welt produziart händ oder düan. Vieli Arta voda Papageiafisch issend nämli Koralla, wasma währenddem taucha sogar köhra cha, und löhnt de Sand hinda usa, wasma au immer wiedr zgseh bechunt.😂
Zrugg an Land simr de zrugg uf Gladstone gfahra mitemna churza Zwüschastopp bir Tankstell. Dr Flipflop isch no wohl uf und chunt witr mit üs mit.😊