Hüt morga gömr direkt uf dia 8i an Hafa, zum üs für d Fähra noch Heron Island iichecka. Domr döt warta müand bis d Fähra de goht nehmr a feina zMorga. Am 9.30 Uhr fahremr de 2 1/2 Stund bismr ufda chlina schöna Insla achömend. Ufm Weg döt hi, isch jetzt au Mol am Marc öpis Luschtigs passiart.😜 Mr sitzend ufda Fährafahrt oba, hinda dussa, wos abr windgschützt isch. Damit mr chli noch vorna gsehnt chömr nu gad uma Egga laufa. Wia dr gröscht Tourist stoht dr Marc uf, stoht döt hära und zagg isch sis gliabta schöna Tächlichäppli weg. Wia zCairns ufm Schiff glernt, winkter ihm hinda nocha. Isch jo ni soo, dass er ida letschta Ziet viel ufmna Böötli gsi isch und er weiss, dass es windet. Zudem hetmes ada Lüt amigs agseh, wia stark es döt windet.😜 Doch zum guata Glück ischs Tächlichäpli zwüscheta Gepäckkontainer ufm undera Stock hänga bliba, so heter das schöna Chäpli ni verlora. Da wär würkli schad gsi. Fascht no luschtiger isch gsi, dass de Schiffsahgstellti, wo am Marc z Chäpli abagholt het nochert ufachunt, döt herastoht und ihm sis Tächlichäpli au davoflügt, abr bis is Meer.😂
Womr de langsam richtig Insla chömend, gseht ma scho das wunderschöna Riff ringsum und mr gsehnt sogar scho mehreri Eagle Rays.😍
Alli ufda Fähra wärdend zum Hotel begleitet und döt gits zerst a Informationsteil für alli. Sie verzellent was ma ni törf und so witr, ma merkt dases a touristischi Insla isch. Aber eba leidr nützt jo au 100mol köhra und 10 Tafla nix bida einta Lüt.
Nochdemr zMittag gessa hend chömr in üses Zimmer ickecka und gad drnoch gömr zum Marine Centre, zum go froga wägm Taucha, welles mora astoht, und wegm Schnorchla, was hüt no ufm Plan isch. Er seit üs, dasses gad Ebba isch und es drum ni schlau isch wegda Koralla, abr dases bim einta Strand schön isch zum Bada und dasmr am 5.30 Uhr döt bim Wrack chönd go Schnorchla. Drum laufen miar am Strand entlang zerst eimol um dInsla und gsehn döt scho einigi Riffhaia.
Nochdem mr de as Glace gässa hend spielemr no a Rundi Billiard und gönd de pünktlich go schnorchla. Es isch mega schön gsi zum döt go schnorchla mr gsehn ganz verschiedeni Fisch, mehrari Riffhaia und a Schildkrot! Zum Glück händmr scho döfa üsi Neoprenazüg, wo für mora sind mitneh (nu niamertem sega, dass er üs dia schu hüt geh het, hetr zu üs gseit😊), denn es isch recht chüal gsi.
Nochm duscha gömr no go zNachtessa und de go Schildkrötli luaga, denn es isch "Nesting Saison" und sie chömend an Land go dEier ablega. Doch leider ohni Erfolg drum beschlüssemr mora is Zentrum go froga, wenn dia bescht Ziet isch und gönd go schlofa.