Mit vollem Tatadrang stümr hüt uf und freuen üs uf üsari nöchsta 2 Tauchgäng. Zerst gnüssemer abr z grossa Zmorgabuffet usgibig, will miar mit Campa eher eifacher Zmörgelet hin. Mitm Böötli gohts öpa 5 Minuta bis zum ersta Spot "Plate Ledge". Mit 6 andera Taucher hüpfemer in dia Salzgumpa bi lichter Strömig. Fascht als letschts vur Gruppa machemer üs ar Ankerleina no ufa Wäg in d Tüfi. Das isch eher nid aso agnehm gsi, miar hin nämli nid vil gsia, will d Luftblosa vu dena vor üs entgega chu sin wegdr Strömig. Abr das isch io nu a churza Moment gsi. D Sicht isch ganz guat gsi und miar hin a hufa cools Züg gsia wia Schildchröttli, Riffhaia, Federschwanz-Stachelrocha und hüfa verschideni Fischli. Alles in allem also a supergeniala, glungna Tauchgang. Noch churzer Pausa zrugg uf dr Insla simr schnell widr parat füra zweita Tauchgang am "North Bommie". Z Abtaucha isch dasmol ohni Strömig und nu z Vierta agnehmer. Dasmol isch z Wasser a biz chüaler und i mitm 3mm Azug brucha grad a biz meh Luft wills mi frürt. D Claudia hets a biz komfortabler ka mitm 7mm, abr derfür dr grösser Chrampf an Land zum drischlüfa.😅 Gsia tüamr ähnlichi cooli Sacha wia bim letschta Tauchgang, miar hin sogär z Glück und gsian a Lionfish. Zrugg uf dr Insla bruchemer zerscht a guata Zmittag, bevor miar üs din ufa Wäg machen zum Schnorchla. Miar chrüchen nebtem Bootsalegger, uf Empfehlig vum Tauchinstruktr, ins Wasser und lün üs um dia halb Insla triba. Vor allem ufm erschta Abschnitt gsiamr a hufa sehr farbigi Koralla und Rifffischli aller Art. Ganz am Schluss, am Shark Bay, gsehmr a hufa Riffhaia und au nomol Stachelrocha und mr gnüssends zMittst im Gemenge dina zsi. A glungni Sach wür i säga. Dernoh heissts asa füacht mit da Flossa underem Arm zrugg zur Unterkunft watschla. Nochemna sehr feina Znacht goht widr a chaiba schüna Tag z End.