Noch so strenga Täg uf dr Heron Island schlofemer hüt amol a biz länger. D Sunna weckt üs am 8i. Nächtig himr no mitemna Iheimischa gredt und er het üs verzellt, dass ma do z Gladstone vielerorts a guata Zahltag het. Es het do nämli viel Industrie und au viel Arbetsplätz wia zum Beispil in dr Aluminiumraffinerie, in dr Mina, bim Cholachraftwerch und am Hafa. Miar fahren hüt as ersts ufna Hügel, wo miar a tiptopi Ussicht uf d Aluminiumraffineri hend, guat schmecka tuats zwor nid, abr es het no intressanti Tourischtataflena derzua. Miar gün nochemna wilali witr ufna andera Hügel, woma meh odr weniger ganz Gladstone gsiat. Dernoh spazieremer no a biz ir Nöchi vum Hafa und gün in Zmittag. Nochm Kaffi machemer üs din langsam ufa Wäg uf Bundaberg. Döt achu, gnüssemer das ruiga Plätzli und spazieren no a biz hi und her. Miar gsian widramol a paar Kängurus und au hufa Regabogalori's und Schuppalori's.