_Gedanke zu Japan_

Grundsätzlich schiint s Läbe do im Vergliich zu de Schwiiz nöd so underschiedlich zsii. E paar Sache sind mer i de letschte Ziit allerdings ufgfalle:

Esse und Rauche i de Stross isch e No-Go. Da isch an und für sich nüüt Neus, aber sisch eifach interessant, wies d Lüüt drum a de verstecktischte Ort gliich mached. I chline, versteckte Pärk zmitzt im Quartier oder im hinderste Egge vo de Fuessgängerbrugg. 🚭🍌

S japanische Volk isch definitiv e velofahrends Volk. Überall sinds mit de Velos underwägs, d Fuessgänger und d Velofahrer teiled sich de Wäg. Sisch erstuunlich wie gwendig die amel chönd uswiiche uf ihrne Stadtgöppel. 🚲🚶‍♀️

Osaka het irgendwie interessanti Architektur, eitönig aber mit ganz verschiedene Stei, Strukture und Muster. 🏫🏦🏪

Überall in Japan mached d Ample Grüsch,sobalds grüe werdet. Entweder machts Signaltön oder es spielt sogar e Liedli, je noch Stadtteil. 🚦🎵🚶‍♂️

Italienische Restaurant sind omnipräsent, uf die Chuchi schiineds bsunders abzfahre. 🍝🇮🇹

D Mode isch natürli au uffällig. Männer fahred i Aazüüg und mit Aktetäsche mit em Velo zum schaffe. Und au Fraue sind immer sehr adrett kleidet. Sneakers het selte öpper aa. Wie au in Korea, hends s „Schichte“-Prinzip wahnsinnig im Griff!👔👞🧢

Usdrück, woni ufgschnappt ha:
* „eeeeeh…!“ wenn ihne öppis gfallt so chli e Pendant zu „nice!“
* „Sosososososoo…“ wenns ihres Verständnis bekundet so chli wie „jo voll/jo genau!“

Im Gpröch verzellt mer e Japanerin, dass in Japan Meinigsbildig nöd so en wichtige Wert isch und au gar nöd gfröget isch. Da bewunderet si a de westliche Kultur. Da wür chli erkläre, wieso si so unvoriignoh und gmüethaft schiined.
Aber sie schätzt s System und d Ordnig im Alltag vo de Japaner:inne. Sisch ruhig i de öffentliche Verkehrsmittel & wani no spannend find: a Konzert dörf nöd gfilmt werde.

Suss bini etz vor allem mit Japanerinne in Kontakt cho, wo mi amel uf mini Handarbeit aagsproche hend. Si schiined de Kontakt z sueche, wenn mer ihne wie chli öppis git, wo si als Start is Gspröch chönd neh. Au de Prediger am Sunntig meint, dass mer d Lüüt do eifach mues iilade, si seget offe & neugierig, wani wür bestätige (oder si chönd nöd Nei sege😅).

D Kafikultur findi no bemerkenswert. Es het ganz vill Kafis wo ihren Kafi selber röstet und denn ufgüssed. I finds no cool zum zueluege mueni sege und es het so en eigne Charme.☕️😇

S Land vo de Getränkeautomate. Woni am Obig mit em Zug id Stadt iifahr, falled di rund um d Uhr belüüchtete Automate gad no.“Stay hydrated!“ 🧃